Warsaxaafadeed Laga Soo Saaray Shirkii Golaha Wasiirrada Ee Shalay.AKHRISO

Shir ay manta oo 26-Janaayo-2012 yeesheen Golaha Wasiirada oo uu shir guddoominayey Ra’iisul Wasaaraha Soomaaliya Dr Abdiweli Mohamed Ali ayaa looga hadlay arrimo dhowr ah oo ay ka mid ahaayeen, amniga, gubashadii suuqa Xamarweyne iyo warbixino laga kala dhageystay guddiga wacyigelinta, Wasiirka Caafimaadka, Wasiir ku xigeenka Gaashaandhiga iyo Wasiir ku xigeenka Macdanta iyo Biyaha.

Wasiirada amniga ayaa sheegay in horumar balaaran laga sameeyey dhanka sugidda amniga, oo roondooyinkii ay si wanaagsan u shaqeeyaan, isla markaana ay maamulada degmooyinka iyo shacabka ay si wanaagsan ula shaqeeyaan ha’adaha amniga.

Golaha wasiiradu waxey u tacsiyeeyeen ganacsatadii uu khasaaraha ka soo gaaray dabkii xalay ka kacay suuqa Xamarweyne. Ra’iisul Wasaaraha Soomaaliya ayaa u saaray guddi baaritaan ku sameeya sababta keentay dabkaas, isla markaana qiimeyn ku soo sameeya khasaaraha inta uu la’egyahay. Guddigan ayaa waxaa ku jira wasaaradaha Ganacsiga, Arrimaha Gudaha, Howlaha Guud, Maalyadda iyo Warfaafinta.

Guddiga heer wasiir ee wacyigelinta ayaa golaha soo hordhigay qorshaha wacyigelinta ku wajahan sidii dhismayaasha dowladda u howlgali lahaayeen oo shacabka loogu adeegi lahaa. Guddigan ayaa la filayaa 12ka cisho ee loo qabtay dadka degan dhismayaasha dowladda inay sameyn doonaan wacyigelin baahsan si dadka degan dhismayaasha loogu sharaxo faa’iidada dhismayaasha dowladda ee ku wajahan in danta guud loogu adeego oo diinteena suuban ay qabto in danta guud laga horumariyo danaha qaaska ah.

Wasiirka Caafimaadka ayaa laga dhageystay warbixin safar uu ku tegey Geneva iyo Nairobi oo uu sheegay in WHO ay oggolaatay fikirkii Dowladda Soomaaliya ee ahaa in shaqaalaha ka howlgala dalka ay intooda badan noqdaan muwaadiniin Soomaaliyeed. Sidoo kale wasiirku waxuu sheegay in WHO ay kaalin fiican ka qaadaneyso dib-u-dhiska adeegyada caafimaadka ee dalka gudihiisa.

Wasiir ku xigeenka Gaashaandhiga ayaa ka warbixiyey shir ay isagu yimaadeen waddamada geeska iyo bariga Afrika ee wajahan in la doorto guddoomiyaha Ciidamada Bariga Afrika. Dowladda Soomaaliyeed waxey ku guuleysatay inay dhexdhexaadiso waddamadii isku heystay jagadaas oo xalkii Soomaaliya la qaatay, laguna guuleystay in guddoomiyihii hore uu sii hayo labada sano ee soo socota. Sidoo kale IGAD waxey go’aamisay in howlagalada Soomaaliya la dar-dargeliyo si kooxaha Al-Shabaab looga sifeeyo dalka gudihiisa.

Ugu danbeytii Wasiir ku xigeenka Macdanta , Biyaha & Tamarta ayaa ka warbixiyey muhiimadda ay leedahay ilaalinta luqadda Soomaaliga taas oo uu sheegay in loo baahanyahay ereyada iyo hikaada ay tahay in la ilaaliyo, isagoo tusaalayaal badan soo  qaatay. Wasiir-Ku xigenka ayaa codsaday Warbaahinta ay sameeyaan wacyigelin lagu xoojinayo luqada hodanka ah ee Soomaaliyeed.