Kulan Looga Hadlayey Dhibaatooyinka Loo Geysto Haweenka Oo Ka Dhacay Magaalada Marka “DAAWO SAWIRRADA”

Kulan ballaaran oo ay ka soo qeyb galeen madax ka tirsan Dowladda Federaalka Soomaaliya, maamulka gobolka Sh/hoose, ururrada haweenka gobolka iyo bulshada ku dhaqan magaalada Marka ee gobolka Sh/hoose ayaa manta ka dhacay magaalada, kaasoo looga hadlayay dhibaatooyinka loo geysto Haweenka.

Kulankan oo ay soo qaban qaabisay Hey’adda CCD ayaa ahaa midkii u horeeyay ee ka dhacay magaalada Marka, waxaana ka qeyb galay Ra’iisul Wasaare kuxigeenka ahna Wasiirka difaaca Dowladda Soomaaliya Xuseen Carab Ciise, Taliyaha ciidamada xooga dalka Jen C/qaadir Sheekh Cali Diini, Guddoomiyaha gobolka Sh/hoose C/qaadir Maxamed Siidi, Taliyaha ciidamada AMISOM ee gobolka Sh/hoose Jen. Micheal Odongo, Taliyaha AMISOM ee deg. Marka Col. Charles iyo xubno kale.

Guddoomiyaha gobolka Sh/hoose C/qaadir Maxamed Siidi oo ugu horeyntii halkaasi ka jeediyay khudbadda furitaanka ayaa sheegay inuu si weyn ugu faraxsan yahay kulanka haweenka magaalada Marka ku dhex maray, taasi oo uu sheegay inay ka mid tahay waxyaabaha ay ka dowlad ahaan iyagu si weyn u raadinayeen.

Waxaa kale oo uu ka hadlay Guddoomiyaha dhibaatooyinkii Al-Shabaab ay ka geysteen gobolka Sh/hoose, gaar ahaan magaalada Marka, isagoo tilmaamay in magaalada Marka ay tahay magaalada ugu xadaaradda fog isla markaana ilbaxnimada dadka Soomaaliyeed ay hoggaanka u heyso.

Guddoomiyaha gobolka Sh/hoose C/qaadir Maxamed Nuur (Siidi) ayaa sheegay in gabdhaha Soomaaliyeed oo markii hore lagu bixin jiray nood iyo xoolaba ay kooxaha khawaarijta ah si xoog ah ku wataan iyadoo waliba gacanta loo gelinayo nin ajnabi ah oo aan dalka u dhalan.

“Waxaan u mahad celinayaa hay’adda CCD oo soo abaabushay kulankaan ay haweenka degmada Marka uga tashanayaan aayahooda iyo sidii ay ugu midoobi lahaayeen inaysan mar kale ku soo laaban gobolka Sh/hoose kooxihii dhibaatada ku hayay shanta sano” ayuu yiri C/qaadir Sheekh Maxamed Siidi.

Taliyaha ciidamada AMISOM ee gobolka Sh/hoose Jen. Micheal Odonga ayaa isna halkaasi ka jeediyay khudbad kooban, wuxuuna kula dardaarmay haweenka degmada Marka inay la shaqeeyaan ciidamada Dowladda iyo kuwa AMISOM, isagoo ku ammaanay dadka ku dhaqan magaalada Marka inay yihiin dad wanaagsan oo nabadda jecel, waxaana uu ku booriyay haweenka inay kaalin mug leh ka qaataan nabad ku soo dabaalida iyo la shaqeynta ciidamada Dowladda iyo AMISOM.

Xuseen Carab Ciise Ra’iisul Wasaare kuxigeenka ahna Wasiirka difaaca Dowladda Federaalka Soomaaliya oo halkaasi ka jeediyay khudbad kooban ayaa sheegay in haweenka Sooomaaliyeed ay yihiin kuwa ay ku dhacday dhibaatada ugu badan ee dalka ka dhacday, taasi oo uu sheegay in isaga qudhiisa ay ku khasabtay inuu Dowladda ka mid noqdo, kaddib markii sida uu sheegay ajaanibta Al-Shabaab ka barbar dagaalameysa ay tacadiyo u geysteen haweenka Soomaaliyeed.

Kulanka magaalada Marka ee gobolka Sh/hoose ka dhacay oo ay ka soo qeyb galeen in ka badan boqol haween ah oo ka kala socday ururrada haweenka iyo qeybaha bulshada ee ku dhaqan gobolka Sh/hoose oo ah kulankii ugu horeeyay ee Hay’adda CCD ku qabato magaalada Marka ayaa la isku dhaafsaday fikrado iyo talooyin ku aadan sidii loo cirib tiri lahaa dhaqamadii kooxda Al-Shabaab ay ku reebtay degaanka iyo sidii haweenka magaalada gacan uga geysan lahaayeen.

Taliyaha ciidamada xooga dalka Jen. C/qaadir Sheekh Cali Diini oo halkaasi ka hadlay ayaa sheegay in haweenka Soomaaliyeed mar kastaba ay yihiin hormuudka bulshada, wuxuuna soo qaatay halgamadii kala duwana ee ay soo mareen ilaa xilligii xorriyadda dalka ilaa xilligii uu dalka ka dhacay dagaalka sokeeye inay ahaayeen kuwii u istaagay badbaadinta bulshada.

“Haweenka degmada Marka iyo dhammaan haweenka Soomaaliyeed waxaan ugu baaqayaa inay soo celiyaan halgankoodii badbaadada shacabka ku dhisnaa si ay nabad u helaan, arrintaasina Dowladdu waxay la garab joogtaa wixii taageero ah oo ay u baahdaan” ayuu yiri Taliye C/qaadir Sh. Cali Diini.

Dhinaca kale waxaa iyana halkaasi khudbado kala duwan ka soo jeediyay Guddoomiyaha haweenka hay’adda CCD Sahra Maxamuud Amiin, Xoghayaha ururka haweenka Qaranka Faadumo Aadan Cosoble, Guddoomiye K/Xigeenada Guddoomiyaha gobolka Sh/hoose iyo gudoomiyaha degmada Marka.

Ugu dambeyn madaxdan ayaa hoosta ka xariiqay isla markaana uga mahad celiyay Hay’adda CCD kulankan ay isugu yimaadeen haweenka degmada Marka markii ugu horeysay tan iyo markii kooxda Al-Shabaab halkaasi laga saaray, iyagoo qaarkood ugu baaqay madaxda CCD inay sii kordhiyaan wadahadalada bulshada ay uga tashanayaan mustaqbalkooda.

Hadii Aad Joogtid Europe,USA iyo Canada Wararka iyo Barnaamijyada ka baxa Radio Muqdisho ee ku dhaafa ka Dhageyso Taleefonkaaga adigoo garaacaya:-

Yurub                         +442035190460

USA & CANADA       +14156550815